.

Der Adventkranz

(bayrische Mundart)

****

Vorigs Jahr hab i mi nu gscheit g´ärgert über de teiern Adventskränz´. da hob i mir gschworn, des passiert mir heier nimma. Selbst is da Mo - hob ja gschickte Händ.

Zérst fahr i oiso aussi in´n Woid und suach Daxn. I bin a bisserl pedantisch und hob ned glei des Richtige gfundn, aba nochdem i a hoibe Stund im Unterhoiz umananda g´schloffn bin, hob i´s ghabt, meine Prachtzweigerl. D´Hosn konn i jetzt nimma braucha, de is volla Harz. Aba de war sowieso scho a bisserl zéng und de Farb hat ma eigentlich nu nia recht gfalln.

Am Parkplatz hab i dann nu mit am Förster a paar Worte - und glei drauf d´Hautfarb - gwechselt. In da Wuad muass i nacha beim Zruckstessen an kloana Baamstumpf übersehgn ham. No ja, i bin kaskoversichert - mit 1000 Euro Selbstbeteiligung!

Hoamwärts hab i na glei no an Blumendroht mitgnumma. den hots zwar bloß auf da 50 Metarolln gebn, aber mei, den ko ma oiwei wieda braucha. I hob des Kranzerl dann recht fest bundn und na hätt´s ma boid ned glangt, de Rolln mit de fuchzg Meta.

Zu am scheena Adventskranz ghört freili a, a Adventsstända. So Laubsägearbeitn hob i ois kloana Bua scho recht gern gmacht. Mittlerweile is ma natürlich fortschrittlicha und drum hob i mia glei so a kloane Tischkreissäg ogschafft. Der Verkäufa war recht freindli und hod ma ois guat erklärt. San a gar ned so teier, solche Sägn. Irgendwie muaß i bei der Erklärung, dann doch was überhört ham! Aber i muaß song, die Schwestan in der Notaufnahme san mindestens genau so freindli gwen, wia da Verkäufa. Ja und zum drittn Adventssonntag is a nacha a fertig wordn, der Malefizständer.

Insgesamt muaß i song, is mir des Werk doch recht guat gelungen. Ma hat sein Spaß dro, es is a kreative Arbat und ma spart na doch an haufa Geld, beim Selbamacha.

Nächst´s Jahr (hod mei Frau gmoant) nächst´s Jahr kannt ma vielliecht wieda oan kaffa, so an Adventkranz.

.

[Kommentare (0) | Permalink]